ప్రభాకర్ చౌదరి ప్రజాన్యూస్ ప్రతినిధి
హైద్రాబాద్ జులై,20(ప్రజాన్యూస్):
*తిండికి నోచని తిప్పల నుండి టిటిడిపి అధ్యక్ష పీఠం వరకు “బక్కని” ప్రస్థానం*
*కడుపేద కుటుంబంలో జన్మించిన బక్కనికి రాజకీయ అందలం*
*టిటిడిపి అధ్యక్ష పదవిని అధిష్టించిన “బక్కని నర్సింహులు”*
*అవివాహితుడు – సంఘ సేవకుడు – ఆధ్యాత్మిక చింతాపరుడు “బక్కని”*
*షాద్‌నగర్ నియోజకవర్గంలో రాజకీయాలకు అతీతంగా హర్షాతిరేకాలు*
*కాంగ్రెస్, టిడిపి, టిఆర్ఎస్, నేతల బహిరంగ అభినందనలు*
కడు పేద వ్యవసాయ కూలీల కుటుంబంలో పుట్టి పట్టెడన్నంకు కూడా నోచుకోని బీద స్థితి నుండి పట్టుదలతో శ్రమించి, విద్యను అభ్యసించి నేడు ఎంతో ఉన్నత స్థితికి చేరిన తెలంగాణ తెలుగుదేశం పార్టీ రాష్ట్ర అధ్యక్ష పీఠాన్ని అధిరోహించిన ఓ సామాన్య వ్యక్తి రాజకీయ ప్రస్థానం ఇది. ఆయనొక అవివాహితుడు, సంఘ సేవకుడు, ఆధ్యాత్మిక చింతనాపరుడు. ఆయనకు పెద్దగా ఆస్తిపాస్తులు లేవు. అయినా రాజకీయ గాంభీర్యం, దీక్షా దక్షత కలిగిన సంస్కారం అతనిది. ఎల్లవేళలా భగవన్నామ స్మరణతో సాగుతూ అందరి తలలో నాలుకైన వ్యక్తి షాద్ నగర్ కు చెందిన సీనియర్ టీటీడీపీ నాయకుడు “బక్కని నర్సిహులు”.
తెలుగుదేశం పార్టీకి ఆయన ఒక నమ్మినబంటు. ఎన్టీఆర్ జమానా నుండి చంద్రబాబు నాయుడు వరకు ఆయన ఎప్పుడు పార్టీ విధేయుడే. ఎందరో పార్టీలు మారినా, ఎన్నో బంపర్ ఆఫర్లు వచ్చినా ఆయన మాత్రం తెలుగుదేశం పార్టీని నమ్ముకుని, నమ్మిన సిద్ధాంతం కోసం కట్టుబడిన వ్యక్తిగా బక్కని నర్సింహులుకు పేరుంది. ప్రజాసేవకు, తెలుగుదేశం పార్టీ రాజకీయ జీవితానికి ఆయన జీవితాన్నే ధార పోశారు. అవివాహితుడుగా నేటికి ప్రజలకు సేవలు అందిస్తున్నారు. భక్తిమార్గంలో ఆధ్యాత్మిక ప్రబోధనలతో ఆయనను అందరు గుర్తిస్తారు. వివేకానంద స్వామి భక్తుడిగా బక్కని నర్సింహులు తన రాజకీయ జీవితాన్ని ప్రారంభించారు.
*ఇదీ నేపధ్యం..*
బక్కని నర్సింహులు సొంత గ్రామం లింగారెడ్డిగూడా, రంగారెడ్డి జిల్లా షాద్ నగర్ నియోజకవర్గంలో బక్కని నర్సింహులు రాజకీయాలకు విశిష్ట ప్రాధాన్యత ఉంది. స్వతహాగా ఎదిగిన బక్కని నర్సింహులు ఎన్టీఆర్ పై అభిమానంతో ఆనాడు 1983లో తెలుగుదేశం పార్టీలో ఓ సామాన్య కార్యకర్తగా చేరారు. ఆ తర్వాత బక్కని జీవవైవిధ్యాన్ని పరిశీలించిన ఎన్టీ రామారావు స్వయంగా ఆయనకు తెలుగుదేశం పార్టీ ఎమ్మెల్యే టికెట్టును అందజేశారు. 1994లో భారీ మెజార్టీతో తన సమీప ప్రత్యర్థి మాజీ మంత్రి శంకర్రావును ఓడించారు. ఆ తరువాత ఆయన ఆధ్యాత్మిక భక్తి శ్రద్ధలను గమనించి తిరుమల తిరుపతి దేవస్థానం బోర్డు సభ్యుడిగా ముఖ్యమంత్రి చంద్రబాబు నాయుడు అవకాశం కల్పించారు. ఆ తర్వాత నర్శింహులు పార్టీ సేవకే పూర్తిగా అంకితమై పోయారు. చంద్రబాబు నాయుడికి నమ్మిన బంటుగా ఉన్నందుకు నేడు రాష్ట్ర అధ్యక్ష పదవి నజరానాగా లభించిందని చెప్పవచ్చు.
*అష్టకష్టాలు ఎదుర్కొని..*
బక్కని నర్సింహులు స్వగ్రామం లింగారెడ్డిగూడా. ఆయన మొదట్లో సంఘ సేవకుడిగా పరిచయం అయ్యారు. వివేకానంద స్వామి సంఘం పేరిట ఆయన యువతను ఏకం చేసి ప్రజలను భక్తి, సన్మార్గంలోకి తీసుకెళ్లారు. భగవద్గీత పారాయణంలో బక్కని నర్సింహులు ఈ ప్రాంతాల్లో చరిత్రకెక్కారు. ఇక్కడ చరిత్ర కలిగిన శ్రీ వెంకటేశ్వర స్వామి దేవాలయ అభివృద్ధిని స్వయంగా తానే చూసుకుంటారు. వెంకటేశ్వర స్వామి దేవాలయం ఆయనకు అత్యంత ప్రీతి పాత్రమైనది. ఆయన ఆ దేవాలయాన్ని విడిచి ఒక్కరోజు కూడా ఉండలేరు.
*బక్కని స్టైలే వేరయా*
బక్కని నర్సింహులు రాజకీయ జీవితంలో నియోజకవర్గంలో అందరినీ పేరుపేరునా పలకరించడం విశేషం. ప్రతి కార్యకర్త పేరు ఆయనకు గుర్తుంటుంది. ప్రతి గ్రామంలో స్వతహాగా ఆయన అభిమానులు ఉంటారు. ఏ గ్రామానికి వెళ్లినా ఆయన ప్రసంగాలు చిన్న పిల్లాడి నుండి ముసలాడి వరకు అందరినీ ఆకట్టుకుంటాయి. అన్ని వర్గాలను తన మాటల ద్వారా ఆకట్టుకుంటారు. బక్కని నర్సింహులు నియోజకవర్గంలో ఎందరికో ఆత్మీయ మిత్రుడు. అందుకే ఈ రోజు ఆయనకు అధ్యక్ష పదవిని ఇస్తే కాంగ్రెస్, టిఆర్ఎస్ పార్టీలలో ఉన్న నాయకులు కూడా ఆయనకు హర్షం ప్రకటిస్తోండడం విశేషం. బక్కని ఎప్పుడు ఆర్భాటాల జోలికి వెళ్లరు. జీవహింస నేరంగా పరిగణిస్తారు. ఆయన శాకాహారి. కార్యకర్తల స్నేహితుల, శ్రేయోభిలాషుల ఇళ్లకు నేరుగా వెళ్తారు. కుటుంబ సభ్యులతో మమేకమై మాట్లాడే విశిష్టత ఆయనకు ఉంది. ఆయన ప్రతి కుటుంబంలో ఓ సభ్యుడిగా ఉంటారు. దీన్నిబట్టి అర్థం చేసుకోవచ్చు ఆయన జీవనశైలి.
*షాద్ నగర్ కు గుర్తింపు*
షాద్ నగర్ నియోజకవర్గానికి బక్కని నర్సింహులు ద్వారా అనేక సందర్భాల్లో గుర్తింపు లభించింది. తెలుగుదేశం ప్రభుత్వ హయాంలో ఉన్నప్పుడు బక్కని చేసిన కార్యక్రమాలు రాష్ట్ర, జాతీయ, అంతర్జాతీయ స్థాయిలో ఉన్నాయి. ప్రపంచ బ్యాంక్ అధ్యక్షుడు యూల్పేన్ సన్, మైక్రోసాఫ్ట్ దిగ్గజం బిల్ గేట్స్ లాంటివారిని నియోజకవర్గానికి రప్పించుటలో ఆయన కృషి ఉంది.
*షాద్ నగర్ లో హర్షాతిరేకాలు*
బక్కని నర్సింహులుకు తెలంగాణ తెలుగుదేశం పార్టీ అధ్యక్షుడిగా అవకాశం రావడంతో షాద్ నగర్ నియోజకవర్గంలో రాజకీయాలకు అతీతంగా అందరూ సంతోషం వ్యక్తం చేశారు. నరసింహులు రాష్ట్ర స్థాయికి ఎదగడం అభినందనీయమని అభినందనల వెల్లువ మొదలైంది. ముఖ్యంగా కాంగ్రెస్, టిఆర్ఎస్ నేతలు శుభాకాంక్షలు తెలుపుతున్నారు..
వ్యాస సమీకరణ
- సంకురాత్రి సతీష్